قصيدة للشاعر المبدع عبدالله باتل الرشيدي

السلام عليكم ورحمة الله وبركاته
وبعد التحية اقدم لكم قصيد للشاعر:


عبدالله باتل الرشيدي البحر الميت
عالم من الابداع وعالم من التألق
تحس فى ابياته الصدق وقوة المعنى
شاعر صعد الى القمة وتربع عليها
ابتعد عن الاضواء
لم ينشر قصائده
ولم يتفاخر بها بالمجالس
يبحث اغلب الناس عن قصائده
ويحفظ اغلب الناس ابياته
انه الابداع
انه البحر النابض بالعطاء
اليكم احبتى هذه االقصائد لهذا البحر واسف للاطالة..





ارجوك بعض المشاعـر لاتهزهزها ........... ترى المشاعـر تألـم عنـد راعيهـا
وترى النفوس العزاز الهـا حواجزهـا ........... وحواجز النفس ستر (ن ) من خوافيها
لا تقول لك كلمة (ن) تحسبك تحرزها.......... وتطيح لاقمـت منهـا منـت قاويهـا
وان قلت لك كلمة (ن) حاول تركزهـا............ ولا ترى الصمت خير (ن) من حكاويها
ودعواك لاصـار مـا تقـدر تنجزهـا........... ازبن على واحد (ن) ساعه وينهيهـا
ولا تجود علـى صبـر (ن)يعجزهـا.......... وتجيك في وسط بيتـك مـا تناديهـا
وكم واحد(ن) حاجتها بالصدر يكنزهـا......... من قل مـن يستمعلـه يـوم يبديهـا
يخشى مـن اللـي يهمزهـا يلمزهـا.......... يضحك بعض ناس لاكن ناس يبكيهـا
وشكواك لابن الردي حذر(ن) تعنزهـا......... يفضحك وتروح فيهـا وانـت كاميهـا
وعليـك تكبـر ولا تقـدر تميـزهـا ........ وتضيع في طوشة(ن) تبلـش بتاليهـا
والسالفـه يقـدر الواحـد يلفـزهـا .......... ويقدر على ناس من شكلـه يمشيهـا
ولاتشغلك حرمة(ن) منـت متجوزها......... تطرد وراهـا وغيـرك يهتنـي فيهـا
ولا يفرحك شوف الارنب لـو تنقزهـا ......... مادام مـا شفتهـا بالنـار شاويهـا
ولاتحسب (ن) الذهب باي يد(ن) يزها........ ترى الذهب ما يغيـر لـون اياديهـا
والنفس حاول بحـد اقصـى تعززهـا........ نفس(ن) بلا عزهـا مانـي مداريهـا
والنـاس لاتقـوم بعيونـك تخززهـا......... احمد على العافيه واسلـك مماشيهـا
ومن طاوع النفس تشقيـه بغرايزهـا......... ومن طاوع العقل يسلم مـن بلاويهـا
والمرجلـه ماتحـب اللـي يهاوزهـا ......... تبي لهـا واحـد(ن) دايـم يحاضيهـا
واللي عيونه مـع الظلمـا يغمزهـا........ ماحد(ن) درى عن عيونه لو يعنيهـا
ونفيستـك وانـت فانـي لاتغزغزهـا......... المقبـره بأنتظـارك وانـت ناسيهـا
والنـاس دورات قادرهـا بعاجـزهـا ......... ماخلـق جنـه ونـار وزعـوا فيهـا
وناس(ن) مع الله وناس ابليس ناغزها......... سبحان من ظل ناس ونـاس هاديهـا
وناس(ن) تعلـت وعلتهـا مراكزهـا ......... وناس(ن) تبي الطيب مير الطيب فاحيها
وناس(ن) تحفز ومعروف(ن) تحفزهـا......... وناس(ن) تبي من يشيمهـا ويعطيهـا
وناس(ن) تلعوز وتسلم من تلعوزهـا.......... وناس(ن) مع اللعوزه تبطـي لياليهـا
وناس(ن) تبي نبز ناس وناس تنبزهـا.......... نابز ومنبـوز ليـن المـوت يفنيهـا
وناس(ن)عجز رزقها يكمل عوايزهـا .......... لاهـي فقـارا وهـي مالله مغنيـهـا
حتى العجايز تبي نـاس(ن) تهمزهـا ........... العافيـه والظنـا مـاهـو مكفيـهـا
وان قمت اعاند تفاكيـري وابارزهـا ......... صارت حجاوي وانا مانـي محجيهـا